Mun ceci rayukan mutane 101 daga ibtila’in gobara a watan satumba

Hukumar kashe gobara ta jihar Kano ta ceci rayukan mutane 101 da dukiyoyin da suka kai Naira miliyan 21 daga ibtila’in gobarar da aka samu sau 21 a watan Satumba.

Mai magana da yawun hukumar Saminu Abdullahi, ne ya bayyana hakan ta cikin wata sanarwa da ya fitar ranar litinin a Kano, inda ya ce hukumar ta samu kiran gaggawa sau 77 da kuma kiran karya sau 11 a tashoshin kashe gobara 27.

Ya kara da cewa rayuka takwas sun salwanta sannan dukiyoyi kimanin Naira miliyan 7 da dubu 300 sun kone kurmus a cikin watan na satumba lokaci.

Abdullahi ya kuma shawarci al’umma da su rinka kula wajen yin amfani da wuta a koda yaushe don kaucewa afkuwar hatsari a nan gaba.