Mun fara raba sabbin kudin Naira a bankuna – CBN

Babban bankin kasa CBN ya ce, sabbin takardun kudi na Naira da aka yi wa gyaran fuska tuni sun isa bankuna domin fara amfani da su.

Gwamnan babban bankin Godwin Emefiele ne ya sanar da hakan a wani rubutu da ya wallafa a shafinsa na Twitte.

Rubutun nasa na zuwa ne bayan ziyarar da ya kai wa shugaban kasa Muhanmadu Buhari a Daura domin yi masa karin bayani kan sake fasalin kudin Naira da kuma manufar dokar takaita kudi da aka samar.

Ya ce, sake fasalin kudin da kuma dawo da manufofin takaita kudin an yi su ne ba don tsanantawa al’umma ba sai don ci gaban tattalin arzikin Najeriya.

Emefiele ya kuma bukaci ‘yan Najeriya da su rungumi hanyoyin sadarwa na zamani da ake amfani da su wajen hada-hadar banki da hada-hadar kudi a Najeriya.