Wata Sabuwa: KAROTA za ta ci gaba da kamen masu goyo a babur

Hukumar KAROTA ta ce, zata ci gaba da kamen masu yin goyo a babur mai ƙafa biyu a Kano.

Shugaban hukumar Baffa Babba Ɗanagundi ne ya bayyana hakan yayin wani taron manema labarai da ya kira a ranar Talata.

Baffa ya ce, a baya Acaɓa aka hana ba goyo ba, amma yanzu doka ta haramta yin goyo ƙarara a babur.

Dama dai an sha kai ruwa rana tsakanin ƴan KAROTA da jama’a kan dokar goyon.

Kotu ma ta taɓa hana hukumar kama masu goyo bayan da wasu lauyoyin al’umma suka shigar da ƙara.

Sai dai a jawabin Baffa Babba ya ce, a baya magana ce ta Acaba shi yasa basu tsananta ba.

Wannan na zuwa ne, ƙasa da yini guda bayan da hukumar ta sanar da dokar hana masu baburan adadaita sahu bin manyan titunan jihar.