Mun gina makarantu ɗari 3 a Jigawa – Dakta Lawan Ɗanzomo

Gwamnatin jihar Jigawa ta ce ya zuwa yanzu ta gina makarantun furamare da na sakandare guda ɗari 3.

Samar da makarantun wani mataki ne na inganta harkokin ilimi a fadin jihar.

Kwamishinan ilimi Dakta Lawan Yunusa Ɗan Zomo ne ya bayyana haka jim kaɗan bayan kammala shirin “Barka da Hantsi” na Freedom Radio.

Dakta Lawan Yunusa Ɗan Zomo ya ce yanzu haka gwamnatin jihar na ƙara aikin tantance malaman makarantun firamare da na sakandare a ƙananan hukumomin jihar domin tabbatar da kyakkyawan tushen ilimi.

“Cikin matakan da muke bi domin farfaɗo da harkar ilimin sun haɗar da shiga inda fulani makiyaya suke domin su ma a basu gudunmawa ta fannin ilimi a fadin jihar”.

Dakta Lawan Yunusa Ɗan Zomo ya ce, a yanzu gwamnatin jihar tana bai wa matasa da suke da ƙwazo a fannoni daban daban na rayuwa aikin yi.