Mun kama tsohon soja da laifin sayar da miyagun ƙwayoyi – NDLEA

Hukumar yaƙi da sha da fataucin miyagun ƙwayoyi ta ƙasa NDLEA ta cafke wani tsohon soja mai shekaru 96 da laifin sayar da miyagun ƙwayoyi a jihar Neja.

Hukumar ta ce, ta kama dattijon mai suna Pa Joseph ne a gidan sa da ke Rafin Sanyi a Suleja.

Wannan na cikin wata sanarwa da hukumar ta fitar mai dauke da sa hannun mai magana da yawun ta Femi Baba Femi.

Sanarwar ta ce, bayan samun bayanan sirri, hukumar ta kai sumame gidan sa, kuma ta same shi da ƙwayoyin kimanin kilo uku.

NDLEA ta ce, a binciken da ta yi ta gano cewa tsohon sojan ya zabi yin sana’ar sayar da miyagun ƙwayoyin ne tun bayan da ya yi ritaya a shekarar 1982.