Muna neman matashin da ya yi ikirarin daina yin Sallah ruwa a jallo – Ibn Sina

Hukumar Hisbah ta Jihar Kano ta ce, tana neman matashin nan ruwa a jallo da yayi ikirarin daina yin sallah sakamakon yi masa aski da aka yi.

Babban kwamandan Hisbah Ustaz Harun Muhammad Sani Ibn Sina ne ya bayyana hakan, a wani sakon murya da ya aikewa Freedom Radio.

Tun da fari dai wani faifan bidiyon ne ya karade shafukan sada zumunta da ke bayyana matashin na bayanin cewa ya daina Sallah tunda har aka aske masa sumar da ya dade yana tarawa a kan sa.

“Wannan ne ya janyo hankalin mu a hukumar Hisbah kasancewar ana ta yada cewa a hukumar aka yi masa askin tare da bulala talatin, a don haka muke nesanta kan mu daga wannan zargi” inji Ibn Sina.

Ibn Sina ya jaddada cewa hukumar na neman tatashin Ruwa a Jallo
sakamakon munanan lafazin da ya yi da rashin ladabi ga shari’ar Musulinci.