Ba za mu lamunci kazanta a ma’aikatun gwamnati ba – Ganduje

Gwamnatin jihar Kano za ta aikewa da hukumar KAROTA takardar gargadi sakamakon rashin tsaftar bandakunan su.

Kwamishinan muhalli Dakta Kabiru Getso ne ya bada umarnin, wanda Babban sakataren ma’aikatar muhalli Adamu Abdu Faragai ya wakilce shi.

Umarnin ya biyo bayan duban tsaftar muhalli na karshen wata da ma’aikatar muhalli ta kai hukumar ta KAROTA.

Adamu Abdu Faragai ya umarci kwamitin da ke lura da tsaftar muhalli cewa ya aikewa hukumar KAROTA takardar gargadi tare da kwalejin harkokin lafiya da kimiyya sakamakon rashin tsaftar bandakunan su.

Sai dai ma’aikatar muhallin ta yabawa sakatariyar karamar hukumar Nasarawa bisa tsaftar muhalli da suka yi har ma ta basu lambar yabo.

A juma’ar karshen kowanne wata ne ake gudanar da duban tsaftar muhalli a ma’aikatun gwamnati da tashoshin mota har ma da kasuwanni.

Sai dai a karo na biyu kenan tawagar tsaftar muhalli na kai ziyara hukumar KAROTA ba tare da samun tarba daga shugabannin ta ba.