OIC ta bukaci Tinubu ya yi gudanar da abubuwan da suka dace

Kungiyar hadin kan kasashen Musulmi ta OIC, ta bayyana nasarar da sabon zababben shugaban kasa a Najeriya, Bola Ahmed Tinubu ya samu a matsayin manuniya ga amincewa da al’ummar Nijeriya suka yi da manufofinsa na ci gaban kasa. 

Shugaban kungiyar Hissein Brahim Taha, ne ya bayyana hakan ta cikin wata sanarwa da Daraktan yada labarai na kungiyar Wajdi Sindi ya sanya wa hannu.

Ta cikin sanarwar Hissein Brahim Taha ya jaddada muhimmancin da kungiyar ta OIC ke bai wa huldarta da Nijeriya inda ya tabbatarwa da sabon zababben shugaban kasan kudurin kungiyar OIC na bunkasa dangantaka da hulda ta kowanne fanni, musamman ma bangaren tattalin arziki da zamantakewa da kuma yaki da ta’addanci da tsauraran akidu.

Shugaban ya kuma yi wa Tinubu fatan samun nasara a ayyukan da ke gabansa, tare da fatan samun hadin kai da ci gaba a fadin Nijeriya.