Rashin Tsaro: Ƴan bindiga sun sace mahaifiyar wani attajiri tare da ajalin mutum guda a Kano

Wasu ƴan bindiga sun afkawa garin Rurum na ƙaramar hukumar Rano da ke nan Kano.

Rahotonni sun ce, ƴan bindigar sun shiga garin ne da misalin ƙarfe 1 na daren Talata, inda suka yi awon gaba da mahaifiyar wani attajiri Alhaji Yusuf Jibrin.

Wani mazaunin garin ya shaida wa Freedom Radio cewa, tun da farko maharan sun buɗe wuta kan mai uwa da wabi, inda suka harbi mutane uku.

Sannan suka yi awon gaba da wani dattijo Alhaji Yusuf Jibrin wanda mahaifi ne ga attajirin da kuma uwar gidansa Hajiya Asabe Jibril.

A hanya ne kuma suka saki mahaifin nasa bayan da suka jikkata shi.

Mazaunin garin ya ƙara da cewa, ɗan uwan sa da ke cikin waɗanda harbi ya shafa Abba Yusuf Gwaɗɗu, ya rasu a asibitin Aminu Kano bayan sallar magaribar ranar Laraba.

Yayin da sauran waɗanda harbin ya shafa da magidancin da ya kuɓuta ke ci gaba da samun kulawar jami’an lafiya.

Ya ce, ba su samu ɗaukin jami’an tsaro ba a lokacin da lamarin ke faruwa har sai bayan tsawon lokaci.

Rundunar ƴan sandan jihar Kano ta tabbatar da faruwar lamarin ta bakin mai magana da yawun ta, DSP Abdullahi Haruna Kiyawa.

Ya ce, mutane biyu ƴan bindigar suka yi garkuwa da su kuma tuni jami’an su, sun samu nasarar kuɓutar da ɗaya daga ciki, sun kuma shiga bincike domin ceto matar.

Wannan hari dai na zuwa ne ƙasa da mako guda bayan da sabon Kwamishinan ƴan sandan Kano ya kama aiki.