Rundunar  Sojin ƙasar nan ta cafke wani mai safarar makamai

Rundunar  Sojin ƙasar nan dake aiki karkashin  Runduna ta 6 sun cafke wani da ake zargi da safarar makamai tare da kwato harsasai 969 a Sarkin Kudu da ke Karamar Hukumar Ibi ta Jihar Taraba.

Hakan  na cikin sanarwar da Daraktan Yaɗa Labaran Runduna ta 6, Laftanar Umar Muhammad, ya fitar aka rabawa manema labarai.

Sanarwar ta ce an cafke Monday Reuben mai shekaru 48 dan Karamar Hukumar Numan ta Jihar Adamawa, a wani shingen bincike bayan samun sahihin bayanan sirri.

Rundunar ta kwato bindigogi kirar AK 47 akwati guda  mai dauke da harsasai 250, fakiti 14  mai dauke da harsasai 700, da harsasai 19,  da kudi Naira miliyan 2,440,000, tare da wasu kayayyaki.

Sanarwar ta kara da cewa ana tsare da wanda ake zargin tare da kayayyakin da aka kwato domin mika su ga hukumomin da suka dace don ci gaba da bincike.