Sakon Sabuwar shekara : PDP ta nemi ‘yan Najeriya su yi wa kasa addu’o’i

Jam’iyyar PDP ta bukaci al’ummar Najeriya da su yiwa kasar addu’oin samun zaman lafiya da kwanciyar hankali da samun bunkasa tattalin arziki a shekarar da muka shiga ta 2021.

Jamiyyar ta PDP ta bayyana hakan ne ta cikin wata sanarwa data fitar a daren jiya a birnin tarayya Abuja mai dauke da sa hannun sakataren ta Mr Kola Ologbondiyan.

Ologbondiyan ta cikin sanarwar ya kuma yabawa ‘yan Najeriya bisa jajir cewar da suke wajen addu’oi na samun zaman lafiya da kwanciyar hankali game da hare-haren da ake samu na yan bindiga da masu garkuwa da mutane a fadin kasar a shekarar data gaba ta 2020.

Ya kuma bukaci ‘yan Najeriya da su cigaba da nuna soyayya a tsakanin su ta hanyar rashin nuna kyama musamman nuna banbancin addini ko kabila.

Sanarwar ta kuma taya al’ummar ta Najeriya murnar shiga sabuwar shekara ta 2021 cikin nasara tare da samun nasarori ta kowanne bangare.