SARS: Ganduje ya dakatar da Salihu Yakasai

Gwamnan Kano Dr. Abdullahi Umar Ganduje ya dakatar da mai bashi shawara na musamman kan yaɗa labarai Salihu Tanko Yakasai daga muƙaminsa.

Kwamishinan yaɗa labaran Kano Malam Muhammad Garba ne ya sanar da hakan cikin wata sanarwa da ya fitar.

An dakatar da Salihu Yakasai saboda bayyana wasu kalaman suka game da gwamnatin shugaban ƙasa Muhammadu Buhari a cewar sanarwar.

Kafin dakatarwar dai Salihu Yakasai ya soki manufofin gwamnatin tarayya a shafinsa na Twitter.

Salihu Yakasai ya soki shugaba Buhari da ƙin yin magana kan koken da ƴan Najeriya ke yi game da ƴan sandan SARS.

Ko a ranar 18 ga watan Afrilun da ya gabata, gwamna Ganduje ya sauke kwamishinan ayyuka na jihar Injiniya Mu’azu Magaji Ɗan Sarauniya sakamakon wasu rubutu da ya wallafa a shafinsa na Facebook.

Ɗan Sarauniya ya wallafa bayanai dake nuna suka ga shugaban ma’aikatan fadar shugaban ƙasa marigayi Malam Abba Kyari.