Sashen kula da albarkatun man fetur ya musanta zargin cewar an bada lasisi guda 38

Sashen kula da Albarkatun man fetur na kasa DPR, ya musanta rahotannin da kafafen yada labaran kasar nan suka yada cewa, ya ba da lasisi guda 38 ga ‘yan kasuwa masu zaman kansu domin kafa kananan matatun mai.

A cewar DPR lasisi 25 kacal ya ba da ba 38 ba kamar yadda aka yi ta yadawa tun da fari.

Hakan na kunshe ne cikin wata sanarwa da sashen ya aikewa manema labarai jiya a Abuja.

A cewar sanarwar daga shekarar 2002 zuwa yanzu masu sha’awar gina kananan matatun mai 105 ne suka mika da bukatar su.

Sashen kula da Albarkatun man fetur din ta cikin sanarwar dai, ya kuma ce, an baiwa ‘yan kasuwar wa’adin watanni goma sha takwas ne domin kammala aikinsu.