Shugaba Buhari ya bukaci yan Najeriya da su hanzarta don karbar katin zabensu

Shugaban kasa Muhammadu Buhari ya bukaci ‘yan-Najeriya su hanzarta karbar katin zabensu na dindindin ka na kuma su zabi duk wanda su ke so yayin babban zaben kasa mai zuwa a badi.

Shugaba Buharin na wannan kira ne a daren jiya a fadarsa da ke Villa a Abuja, lokacin buda-baki tare da ma’aikatan bangaren Shari’a karkashin jagorancin Alkalin Kotun Koli mai Shari’a Olukayode Ariwoola.

Yayin mayar da martani kan jawabin da tsohon babban Jojin kasar nan Alfa Belgore ya yi na cewa Buhari ya na kaunar kasar nan kuma akwai bukatar samun mutanen kirki a tare da shi, shugaban kasa ya danganta nasarar zaben da ya yi a shekarar 2015 da fasahar zamani da aka yi amfani da ita.

Shugaban kasa Muhammadu Buhari ya shaida cewa tuntuni ya shawarci gwamnoni su wayar da kan al’ummar Jihohinsu kan muhimmancin samun katin zabe na dindindin, tamkar katin shaidar ‘dan-kasa.