Shugaba Buhari ya yi ganawar sirri da babban sufeton ‘yan sanda Ibrahim Idris

Shugaban kasa Muhammadu Buhari yayi wata ganawar sirri da babban sufeton ‘yan sandan Najeriya Ibrahim Idris yau juma’a, a fadar Villa da ke Abuja.

Rahotanni sun ruwaito cewa har yanzu ba’a yi wani bayani ba kan abubuwan da suka tattauna a kai, wanda suka kammala da misalin karfe 2:35 na rana.

Wannan na zuwa ne bayan kwana guda da lokacin ritayar babban sufeton ‘yan sandan, da ya kamata ya yi jiya 3 ga watan Janairu, inda zai cika shekaru 60 da haihuwa ranar 15 ga wata.

Akwai dai rade-radin cewa shugaban kasa Mauhammadu Buhari ka iya kara wa shugabancin babban sufeton ‘yan sandan wa’adi, a wani bangare na tsaurara matakan tsaro a babban zaben kasar nan da zai gudana a watan gobe.

Rahotanni sun bayyana cewa babbar jam’iyyar hamayya ta PDP na ciagaba da sukar wannan mataki, da ke cigaba da yaduwa a kafafen sada zumunta da kuma na yada labarai.