Sojoji sun kashe kwamandojin ISWAP 50

Rundunar sojin ƙasar nan ta ce dakarun ta sun samu nasarar kashe aƙalla kwamandoji da mambobin ƙungiyar ISWAP 50 a wani farmaki da suka kai a ƙaramar hukumar Askira Uba a jihar Borno.

Mai magana da yawun rundunar birgediya janar Onyema Nwachukwu ne ya tabbatar da hakan a cikin wata sanarwa da ya fitar a ranar Litinin.

Nwachukwu ya ce, dakarun sojin haɗin gwiwa da na Operation Haɗin kai da ke Arewa maso Gabas sun yi nasarar kashe ‘yan ta’addar kungiyar ISWAP sama da 50 tare da lalata kayan da suke ta’addanci da su .

Sojojin sun kuma yi luguden wuta kan motar ‘yan ta’addan da kuma wata motar sulke.

Idan dai za a iya tunawa a ranar Asabar din da ta gabata ne yan ta’addar na ISWAP suka kai hari a wani sansanin soji da ke Askira Uba, tare da yin kwanton ɓauna inda suka kashe birgediya janar Dzarma Zirkushu da wasu sojoji uku.