Sojojin Nijeriya sun tarwatsa haramtattun wuraren tace Mai

Dakarun Sojojin saman Nijeriya  na Operation Delta Safe sun tarwatsa wasu haramtattun wuraren tace danyen Man Fetur babisa ka’ida ba tare da gano jiragen ruwan dakon kaya maƙare da ɗanyen mai da aka sace a yankin Neja Delta.

Hakan na kunshe ne ta cikin sanarwar Daraktan yaɗa labarai na rundunar sojin saman Nijeriya Edward Gabkwet, ya fitar.

Sanarwar ta ruwaito cewa, an gano cibiyoyin da jiragen ruwan dakon kayan ne tsakanin 25 da 26 ga watan nan da muke ciki na Maris a wasu yankunan jihar Rivers.

Ya kuma ce, an gano wani jirgin dakon kaya a yankin Bille cike da albarkatun mai da aka tace ba bisa ƙa’ida ba.

Sanarwar ta kuma bayyana cewa, sojoji sun ƙona wasu wurare da aka gano ana tace ɗanyen mai ba bisa ƙa’ida ba inda kuma suka banka musu wuta.