Tattalin arziki: Buhari ya isa ƙasar Saudiyya

Shugaban ƙasa Muhammadu Buhari ya isa birnin Riyadh na ƙasar Saudi Arabia.

Shugaba Buhari ya isa birnin ne don halartar taron zuba hannun jari karo na biyar.

Rahotanni sun bayyana cewa shugaban ya sauka a filin jirgin saman sarki Khalid a birnin Riyadh da misalin ƙarfe 11 na dare.

Haka zalika ya samu tarba daga tawagar gwamnati da jakadancin ƙasar, baya ga tawagar rakiyar sa da suka haɗar da ministoci da sauran ƴan Najeriya mazauna Saudi Arabia.

Tuni dai sanarwar da mai magana da yawun shugaba Buhari, Malam Garba Shehu ya fitar, ta bayyana cewa shugaba Buhari zai gabatar da ibadar Umara gabanin dawowar sa gida bayan kammala taron.