Tsaro: An kama mutane biyu da ake zargi da kashe dan sintiri a Kano

Rundunar ‘yan sandan jihar Kano ta tabbatarda yin nasarar kama wasu matasa biyu da ake zargi da laifin kashe wani dan kugiyar sintiri a gidansa dake karamar hukumar Kiru a nan Kano.

A cewar rundunar matasan sun haura gidan dan kungiyar sintirin mai suna Ibrahim Shu’aibu a ranar ashirin da tara ga watan da ya gabata a cikin dare dauke da makamai suka kuma harbeshi.

Daga cikin wadanda ake zargin akwai Abdulganiyyu Gambo dake Kauyen Kariya a Kiru sai Muhammad Sani dake Hayin Gwarmai a karamar Hukumar Bebeji.

Mai magana da yawun rundunar ‘yan sandan ta Kano DSP Abdullahi Haruna Kiyawa, ya ce, matasan da aka kama sun tabbatar da aikata laifin da ake zarginsu dashi kuma sun kwashe sama da shekaru takwas suna garkuwa da mutane da kuma satar Shanun jama’a.