Tsaro: Ganduje ya haramta sayar da gidaje da filaye barkatai

Gwamnatin jihar Kano, ta bada umarnin cewa daga ranar Lahadi, ba za’a ƙara sayarwa ko bayar da hayar gida ko fili ba a faɗin jihar, ba tare da sahalewar dagaci ko kuma wasu wakilai da aka aminta da su ba a hukumance.

Hakan ya fito ne ta cikin wata sanarwa da kakakin sakataren gwamnatin Musa Tanko Muhammad ya fitar, wadda ta ce an dauki wannan mataki ne domin a inganta tsaro, tare da tabbatar da kare rayuka da dukiyoyin al’ummar jiharnan.

Ya kuma kara da cewa matakin na tafiya ne, ƙafa da ƙafa da abin da gwamnatin tarayya ta sanya a gaba na kawo karshen matsalar rashin tsaro da kuma ‘yan bindiga a wasu sassan kasar nan, kamar yadda BBC Hausa suka rawaito.