Wasu mata hudu sun mutu sanadiyar kifewar kwale-kwale

Wani Kwale-kwale da ya kife a cikin ruwa a karamar hukumar Kankara ta Jihar Katsina ya yi sanadiyyar mutuwar wasu ‘yan-mata hudu.

‘Yan-matan da hatsarin ya ritsa da su su ne Yasira Sulaiman mai 16 da Safara’u Sa’idu mai shekaru 16, sai Nana Firdausi Ibrahim ‘yar shekaru 16 da kuma Zakiyya Isiya mai shekaru 17.

Lamarin dai ya faru ne a Dam din Mashiga lokacin da ‘yan-matan su ka hau Kwale-Kwalen domin wani Kauye da ke Makwabtaka da su domin sayen Zogale.

Mai magana da yawun rundunar ‘yan-sandan Jihar Katsina SP Gambo Isah ya tabbatar da faruwar lamarin yana mai cewa ‘yan-matan sun fito ne daga kauyen Dan Zango.

Ya kuma kara da cewa wasu mutane ne suka kaiwa ‘yan-matan agaji har suka ceto guda daga cikinsu mai suna Maryam Zubairu mai shekaru 13, tare da direban Kwal-kwalen.