Yadda zaman shari’ar Abduljabbar ke kasancewa

Yau ne ake sa ran Malam Abduljabbar zai fara kare kansa bisa tuhumar da ake masa.

Babbar kotun Shari’ar musulunci mai zamanta a ƙofar kudu ƙarƙashin jagorancin mai Shari’a Ibrahim Sarki Yola ta fara sauraron shaidun kariya a ƙunshin tuhumar da gwamnatin jihar Kano ke yiwa malamin.

Tuni dai kotun ta zauna da safiyar yau Alhamis wanda kuma Lauyansa Malami A. O Muhammad (SAN) ya roƙi Kotu ta dawo da shaida na farko da na biyu domin sake yi musu tambaya.

Wakilan Freedom Radio da ke kotun Yusuf Nadabo Ismail da Aminu Abdu Baka Noma sun rawaito cewa an jibge tarin jami’an tsaro a harabar kotun.

Idan za a iya tunawa ana dai zargin malam Abduljabbar da laifin ɓatanci ga fiyayyen halitta Annabi Muhammadu zargin da malamin ya musanta, a zaman kotun na yau Alhamis.