An fara yunƙurin tsige mataimakin Gwamnan Zamfara

Majalisar dokokin jihar Zamfara na shirin tsige mataimakin Gwamnan jihar Barista Mahdi Ali Gusau.

Wannan dai ya biyo bayan zarginsa da wasu laifuka guda takwas da kundin tsarin mulkin ƙasa ya amince a tsige me irin wannan laifukan.

Shugaban majalisar dokokin jihar Nasiru Ma’azu Magarya ne ya bayyana haka a lokacin da yake yiwa wakilin Freedom Radio Yusuf Ibrahim Jargaba ƙarin bayani.

Ya ce “Yau da safe ƴan majalisar sun gabatar da takarda kan buƙatar su ta a tsige mataimakin Gwamnan, kuma na karɓi takardar”.

“Za mu zauna mu yi nazari kafin mu aiwatar da hukunci na gaba” a cewar Magarya.

Ana zargin hakan na da nasaba da ƙin komawar mataimakin gwamnan zuwa jam’iyyar APC bayan da Gwamna Bello Matawalle ya bar jam’iyyar PDP ya koma APC.