‘Yan jarida sun yiwa kalamaina gurguwar fahimta – Tinubu

Jagoran jam’iyyar APC na kasa Asiwaju Bola Tinubu, ya ce al’ummar Najeriya sun yiwa kalaman sa gurguwar fahimta kan bukatar samun karin jami’an tsaro.

A cewar sa ya bukaci gwamnatin tarayya da ta kara daukan sabbin jami’an tsaro a kasar nan dubu hamsin, ba miliyon hamsin ba kamar yadda wasu ke fada.

Tsohon gwamnan jihar ta Lagos Tinubu ya bayyana hakan ne cikin wata sanarwar da ya fitar ta hannun mai bashi shawara kan kafafen yada labarai Mr. Tunde Rahman.

A cewar sanarwar Tinubu na nufin gwamnatin ta kara daukan sabbin jami’an tsaro dubu hamsin da suka hadar da jami’an ‘yan sanda da Civil Defence da kuma jami’an Soji, domin inganta sha’anin tsaro a kasar nan.