‘Yan Sanda a Kano sun kama wasu mutane 29 da take zargin ‘yan daba ne

Rundunar ‘yan sandan Jihar Kano ta kama wasu batagari da take zargin ‘Yan Daba ne wanda yawansu ya kai 29 a dai-dai lokacin da ake gudanar da taron Takutaha dauke da muggan makamai a nan Kano.

Jami’in hulda da jama’a na rundunar SP Abdullahi Haruna Kiyawa ne ya bayyana hakan ga manema labarai da yammacin jiya Juma’a.

SP Haruna Kiyawa ya kara da cewa ‘babban Sifeton rundunar ‘yan sandan kasar nan Kayode Emetekon ne ya bada umarnin kara tsaurara matakan tsaro a fadin kasar nan a lokacin gudanarda tarukan Maulidi domin ganin anyi taron cikin koshin lafiya’.

Freedom Radio ta ruwaito cewa mai magana da yawun rundunar SP Abdullahi Haruna Kiyawa ya ce ‘da zarar rundunar ta kammala gudanarda bincike akan matasan da ake zargi zasu gurfanar dasu a gaban Kotu’.

Rahoton: Abdulkarim Muhammad Abdulkarim