‘Yan Tifa sun sake gina wata gada da ta lalace

Kungiyar direbobin Tifar yashi ta jihar Kano reshen kwanar ‘yan Tifa ta gina wata katafariyar Gada a Karamar hukumar Nasarawa domin ragewa gwamnati nauyin dake kanta.

Shugaban Kungiyar Direbobin Tifar yashi ta kasa shiyar Kano Kwamared Mamuni Ibrahim Takai ne ya shaida hakan lokacin bikin bude katafariyar Gada da reshen Kwanar Tifa suka gina.

Mamuni Ibrahim Takai ya ce ‘yan kungiyar sun dauki matakin sake gina gadar ne bayan karyewa da ta yi domin su ragewa Gwamnati aiki da kuma taimakawa mazauna yankin baki daya.

Shugaban kungiyar Mamuni Takai ya kuma yi kira ga sauran mambobin kungiyar dasu rika gudanar da ayyukan alkairi a yankunan da suke gudanar da sana’ar domin farantawa al’ummar yankunan.

Wakilin mu Abdulkarim Muhammad Abdulkarim Tukuntawa ya ruwaito Shugaban Kungiyar reshen Kwanar Tifa Yahya Sadi Adamu na yabawa sauran mambobin kungiyar bisa kokarin da suka yi, inda kuma kara tabbartar da cewa za su ci gaba gudanar da ayyukan alkairi a unguwar.