Yanzu –yanzu : ‘Yan majalisar Kano suka shiga ganawar sirri da Ganduje

A halin da ake ciki bayan sun kai ziyarar gaisuwar sallah ga gwamnan Kano ‘yan majalisar dokoki ta Kano sun kuma shiga ganawar sirri.

Da yammacin yau ne tawagar majalisar Dokokin jihar Kano karkashin jagorancin shugaban majalisar Abdulaziz Garba Gafasa suka kawo ziyarar gaisuwar Sallah ga gwamnan Kano.

Kakakin majalisar dokokin Abdulaziz Garba Gafasa ya ce sun kawo ziyarar ne domin yin gaisuwar Sallah ga gwamnan na Kano tare da godiya bisa ga yadda kyakkyawar dangantaka ke wanzuwa tsakanin majalisar dokokin da gwamnati.

Abdulaziz Gafasa ya Kara da cewa za kuma su cigaba da iyakar kokarin su wajen ganin ana cigaba da samun kyakkyawar dangantaka tsakanin majalisar da kuma gwamnati.

Da yake jawabi yayin karbar Yan majalisun Gwamnan na Kano Dr Abdullahi Umar Ganduje ya bayyana jin dadin sa bisa ga ziyarar inda yace abu ne mai kyau yadda dangantaka ke yin kyau a tsakanin su.

Wakiliyar mu Zahrau Nasir ta ruwaito cew, ‘yan majalisar sun kuma shiga ganawar sirri da gwamnan na Kano bayan kammala jawabin gaishe-gaishe.