Za mu ci gaba da tallafawa marayu – Inuwar marayu

Inuwar Marayu da gajiyayyu ta Tudun Maliki, ta sha alwashin ci gaba da tallafawa ‘yaran da iyayen su suka rasu da iyayen da aka barsu da marayu da tallafin kayan abinci da kula da lafiyar su da Ilimin su.

Shugaban kungiyar Alhaji, Abdulkadir Kabiru Bayero, ne ya bayyana hakan ta bakin, mai magana da yawun kungiyar Malam Mustafha Karaye Ibrahim, yayin rabon tallafin kayan abinci na garin masara da Taliya da gidauniyar tallafawa al’umma ta Dangote ta baiwa kungiyar don Tallafawa marayu da gajiyayyun dake yankin unguwar ta Tudin Maliki.

Malam Mustapha Karaye Ibrahim, ya kuma ja hankalin masu hannu da shuni da daidaikun mutane wajen tallafawa wadan da basu dashi.

Wasu daga cikin ‘iyayan marayun da suka amfana da tallafin kayan Abincin da kamfanin na Dangote ya bayar don rabawa a karkashin kungiyar ta Inuwar Marayu da gajiyayyu dake Tudin Maliki sun bayyana farin cikin su da samun tallafin inda suka ce tallafin ya zo adaidai lokacin da ake bukatar sa.

Wakilin mu Abubakar Tijjani Rabi’u ya rawaito cewa, gidajen marayu 178 ne za su amfana da tallafin kayan abincin da gidauniyar ta Dangote ta bayar a unguwar ta Tudin Maliki.