Za mu samar da ofishin NBC na din-din-din a Kano – Ganduje

Gwamnatin jihar Kano ta ce, za ta samar da ofishin na din-din-din ga hukumar kula da kafafen yaɗa labarai anan Kano.

Gwamna Dakta Abdullahi Umar Ganduje ne ya bayyana hakan lokacin da ya karbi bakuncin sabon shugaban hukumar Alhaji Balarabe Shehu Ilela a gidan gwamnati.

Ganduje ya ce “Muna buƙatar hukumar NBC ta sake sanya ido sosai a kafafen yaɗa labaran mu musamman a zaben 2023 da yake ƙaratowa don hana irin waɗannan matsaloli”.

Gwamnan ya ce, hakan ne ya sanya gwamnatin Kano za ta mayar da hankali wajen samar da ofishin hukumar NBC na kashin kan su a Kano, don ƙara tsaftace harkokin yada labarai musamman a lokacin zaɓe.