Za mu tallafawa kamfanonin da suka durkushe a Kano – Gwamnati

Ministan ciniki, kamfanoni da zuba jari Otunba Niyi Adebayo ya ce gwamnatin tarayya zata tallafa wajen farfado da kamfanoni da suka durkushe  a jihar Kano, kasancewar su ne ginshikai wajen bunkasa tattalin arzikin kasar nan, bayan da annubar cutar COVOID-19 ta kawo koma a wannan bangaren tattalin arzikin kasar nan.

Mr Otunba Adebayo ya bada tabbacin ne lokacin da ya kai ziyarar girmamawa ga mai martaba sarkin Kano Alhaji Aminu Ado Bayero a fadar sa.

Ministan wanda ya sami wakilcin babban darakatan tsare-tsare na ma’aikatar Alhaji Tijjani Inuwa Babura ya ce sun zo Kano ne don tantance adadin kamfanonin da annubar Korona ta yi wa illa, da kuma tattaunawa da masu ruwa da tsaki don samu bakin-zaran don tallafawa masu kamfanoni a nan Kano.