Za mu yi duk mai yiwuwa don ceto dalibai – El-Rufai

Gwamnatin jihar Kaduna ta ce za tayi duk mai yiwuwa wajen ganin ta ceto daliban kwalejin nazarin tsirrai da dazuka ta kasa da ke Afaka, a yankin karamar hukumar Igabi da ke jihar.

A baya-bayan nan ne dai ‘yan bindiga su ka yi garkuwa da daliban su talatin da tara.

Kwamishinan harkokin cikin gida da tsaro na jihar Kaduna Samuel Aruwan ne ya bayyana haka yayin zantawa da manema labarai.

Ya ce jami’an tsaro da suka hada da: sojoji da ‘yan sanda da jami’an hukumar tsaron sirri ta (DSS) sun dukufa suna aiki ba dare ba rana don ganin sun ceto daliban daga hannun ‘yan ta’addar.

A baya-bayan nan ne dai ‘yan bindiga suka sace daliban mata ashirin da uku da maza goma sha shida, sannan suka bukaci da a biya su kudin fansa na naira miliyan dari biyar.