Zanga-zanga ta barke a Iran bayan kisan Ayatollah

Iraniyawa sun fantsama kan tituna inda suke gudanar da zanga-zanga tare da yin alhini bayan Amurka da Isra’ila sun kashe Jagoran Addini na ƙasar Khamenei a harin da suka kai masa.

Zanga-zanga ta ɓarke a yau Lahadi a faɗin ƙasar ta Iran bayan sanarwar da aka fitar cewa Amurka da Isra’ila sun kashe Jagoran Addini Ali Khamenei a hare-haren soji da suka kai ƙasar.

Lamarin ya jefa yankin Gabas ta Tsakiya cikin zaman zulumi kuma ya jawo kakausan martani daga cikin ƙasar.

Tun da farko gidan talbijin na Iran ya tabbatar da mutuwar Khamenei a hare-haren Amurka da Isra’ila, inda ya bayyana cewa Jagoran Addini na Juyin-juya-halin ya yi shahada.

Kazalika gwamnatin ƙasar ta sanar da makokin kwana 40 tare da bayar da hutun kwana bakwai.