Zulum ya kai ziyarar jajantawa ga iyalan jami’an tsaron da suka rasu

Gwamnan jihar Borno Farfesa Babagana Umara Zulum, ya kai ziyarar jajantawa ga iyalan jami’an tsaron da suka rasa rayukan su da ma wadanda suka jikkata sakamakon harin da aka kai wa tawagarsa a ranar Juma’ar da ta gabata a yankin Baga.

Hakan na cikin wata sanarwar ce da mai bai wa gwamnan shawara kan yada labarai Malam Isah Gusau ya fitar a jiya Litinin.

Sanarwar ta bayyana cewa tun a jiya Litinin gwamna Zulum ya kai ziyarar jajantawa ga iyalan jami’an tsaron tare da yi musu alkawarin zai ci gaba da basu kulawar da ta dace don inganta rayuwarsu.

Ta cikin sanarwar ta bayyana cewa, gwamnan ya bayyana takaicinsa kan harin da yayi sanadiyyar mutuwar jami’an tsaron sa, inda ya yi fatan samun rahma ga wadanda suka rasa rayukan su.