Buhari ya yi tir da harin da aka kai wa ma’aikatan bada agaji a Borno

Shugaban kasa Muhammadu Buhari yayi All…..wadai da kisan da ‘yan bindiga suka yiwa wasu ma’aikatan bada agaji a jihar Borno tare da yin garkuwa da wasu guda biyu.

Awatan da ya gabata ne dai ‘yan bindigar su ka yi garkuwa da mutanen.

Hakan na cikin wata sanarwa ce da babban mai bai wa shugaban kasa shawara kan harkokin yada labarai Malam Garba Shehu ya fitar a jiya Laraba.

Sanarwar na dauke da sakon ta’aziyya ga iyalan mamatan guda biyar da ‘yan tada kayar bayar suka kashe a baya baya nan.

Sanarwar ta kara da cewa, gwamnatin tarayya za ta yi duk me yiwuwa wajen kawo karshen ayyukan Boko Haram a yankin arewa maso gabashin kasar nan.

Sai dai sanarwar ta kuma jinjinawa jami’an tsaron kasar nan da irin sadaukarwar da suke wajen ganin sun dakile ayyukan boko Haram da sauran ta’addanci.