Ɓaraka ta ɗinke a APCn Kano – Abdullahi Abbas

Shugaban jam’iyyar APC na Kano Alhaji Abdullahi Abbas ya ce an ɗinke ɓarakar da ta kunno a jam’iyyar.

A wani saƙon murya da Freedom Radio ta samu, shugaban ya ce Gwamnan Kano Dr. Abdullahi Umar Ganduje ya jagoranci sasanta rikicin da ya kunno a APCn.

A makon da ya gabata ne rikici ya ɓarke tsakanin shugaban masu rinjaye na majalisar tarayya Alhassan Ado Doguwa da Mataimakin ɗan takarar Gwamnan APC Murtala Sule Garo.

Sai dai Abdullahi Abbas ya ce, yanzu an yi maslaha kowa ya yafewa kowa.

Shugaban ya yi kira ga sojojin baka da ƴan social media kan su ci gaba da bai wa jam’iyyar haɗin kai.

A ranar Lahadi ne jam’iyyar APC ta gudanar da taron masu ruwa da tsakinta kan wannan rikici a fadar Gwamnatin Kano.