Zargin ɓata suna: Kotu ta ce a tsalala bulala ga Mubarak Unique Picking da maja bakinsa

Kotun Majistare mai Lamba 58 ta yanke hukuncin tsalala bulala goma ga Mubarak Muhammad da aka fi sa ni da Unique Picking da mai ja masa baƙi Nazifi Isa Muhammad.

A zaman kotun na yau Litinin, ƙarƙashin jagorancin mai sharia Aminu Gabari ta ce, Mubarak da mai ja masa baki Nazifi za su biya tarar Naira dubu 10 ga kowanne laifi.

Haka kuma kotun ta ce, daga yanzu za su riƙa share kotun na tsawon wata ɗaya.

Daga ƙarshe ma kotun ta umarcesu da wallafa wani bidiyon da za su wanke gwamna Ganduje bisa ɓatancin da suka yi masa.

Tunda fari dai an gurfanar da Mubarak Muhammad da aka fi sa ni da Unique Picking da mai ja masa baki Nazifi Isa Muhammad a gaban kotu bisa tuhumar haɗa kai da ɓata suna ga gwamna Ganduje.

Cikin wani bidiyo da suka wallafa a shafinsu na Tiktok, kuma bayan karanto musu laifin sun amsa da bakinsu, kamar yadda wakilinmu na Aminu Abdu Bakanoma ya rawaito.