Ɗaurin Aure: Hatsarin mota ya hallaka ƴan Kano 8 a hanyar Zariya

Wasu matasa ƴan asalin jihar Kano takwas sun rasa ransu, sakamakon wani haɗarin mota.

Haɗarin ya faru ne yayin da suke hanyar dawowa daga ɗaurin aure da suka je garin Zariya, da yammacin ranar Asabar.

Waɗanda lamarin ya rutsa da su ƴan asalin unguwar Sani Mainagge ne da ke ƙaramar hukumar Gwale.

Ɗan uwan angon Abubakar Yusuf Usman ya shaida wa Freedom Radio cewa, an kawo gawar matasan 8.

Sannan ya ce, akwai ƙarin mutane 3 da suka rasa ransu sanadiyyar hatsarin, amma ba ƴan Kano ba ne.

Wakilin mu Aminu Abdu Baka Noma, ya raiwaito cewa, al’ummar unguwar Sani Mainaggen suka shiga cikin jimami.

Sannan an fara shirin yi musu jana’iza a gobe Lahadi.