Za mu ladabtar da wadanda suka karya dokar hana amfani da shafin Twitter – Buhari

Gwamnatin tarayya ta bayar da umarnin kamawa tare da hukunta wadanda suka karya dokar haramata amfani da shafin tiwita a Najeriya.

Ministan shari’a kuma Atoni janar na tarayya Abubakar Malami ne ya bada umarnin.

A cikin wata sanarwa da mai magana da yawunsa Dr Umar Jibril Gwandu ya fitar ta bayyana cewa duk wanda aka kama da karya dokar zai fuskanci hukunci.

A juma’ar nan ne dai ministan yada labarai da al’adu Alhaji Lai Muhammad ya sanar da dakatar da kamfanin tiwita daga aiki a Najeriya har sai abinda hali ya yi.

A sakamakon abinda kamfanin ya yi na goge wani jawabi da shugaban kasa Muhammadu Buhari ya wallafa yana gargadin masu tayar a hargitsi a kudancin kasar nan da su kuka da kansu, domin gwamnatin ba za ta nade hannu tana kallon suna kashe mutane haka kawai ba.