Gwamnatin tarayya za ta yi wata ganawa da gamayyar kungiyoyin lafiya na kasar nan JUHESU.

Ganawar za ta mayar da hankali wajen tattauna batun tsunduma yajin aiki da JUHESU suka ƙudiri aniyar yi a faɗin ƙasar nan.

Wata sanarwa da mataimakin jami’in hulda da jama’a na ma’aikatar ƙwadago da samar da aikin yi Mr Charles Akpan, ya fitar ce ta sanar da hakan.

A gobe Talata 7 ga watan Satumba za a gudanar da ganawar kamar yadda ministan ƙwadago Chris Ngige ya bada umarni.

Ngige ya ce, zai gana da shugabannin kungiyar, kan barazanar da suka yi na tsunduma yajin aiki a ranar 3 ga Satumba kan rashin biyan mambobin ƙungiyar kuɗaɗen su da sauran buƙatu.