A buɗe sauran shagunan da ba na sayar da magani ba -Dilolin magani ga NAFDAC

Wasu daga cikin ‘yan kasuwar mai Ƙarami Plaza da ke yankin Malam Kato a Kano, sun bukaci hukumar kula da ingancin abinci da magunguna NAFDAC ta buɗe sauran shagunan da ba na sayar da magani ba wanda ta kulle sakamakon saɓani da aka samu a kasuwar.

Mutanan sun bayyana hakan yayin wani taron gangami da suka gudanar a yammacin ranar Talata.

Ƴan kasuwar sun ce ba masu magani kaɗai ba ne ke kasuwanci a kasuwar ta Mai Karami Plaza, a don haka bai kamata a rufe kasuwar ba.

Sun Kuma ce yanzu haka sakamakon rufe kasuwar da aka yi wasun su na neman su fara tagayyara.

Wakilin mu Aminu Abdu Baka Noma ya rawaito cewa, Koda suka tuntuɓi hukumar ta NAFDAC kan wannan batu, ta ce ta samu koken nasu kuma ta bayar da damar aje a gudanar da bincike domin tantance shagunan da ba na sayar da magani ba don ci gaba da kasuwanci.