Abduljabbar na fama da rashin lafiya a gidan gyaran hali

Lauyan Malam Abduljabbar Kabara Barista Rabiu Shu’aibu Abdullahi ya tabbatar da cewa malamin bashi da lafiya yanzu haka da yake tsare a gidan gyaran hali.

Sai dai Barista Rabiu ya musanta zargin da ake yaɗawa cewar an sakawa malamin guba a abinci a gidan gyaran halin da yake tsare.

“tabbas Malam bashi da lafiya, amma tuni an samo likita ya duba shi kuma ya bashi magani, har ma ya samu sauki a halin yanzu” Lauyan Abduljabbar.

Itama hukumar kula da gidan gyaran hali na Kano DSC Musbahu Lawan Kofar Nasarawa ya ce, malamin bai taba shan ruwa ko abincin gidan gyaran hali ba, a don haka babu wani abu da ya same shi.

“Mun samu labarin wani lauya ne ya fitar da labarin cewa an ba shi guba a inda ya ke tsare, wannan ne ya sanya muka baza jami’an mu don gano wanda yayi wannan kalami tare da ɗaukar mataki a kan sa” inji DSC Musbahu Lawan Kofar Nasarawa.