Abokin Kowa: Sabon Kwamishinan ƴan sandan Kano ya kama aiki

Sabon Kwamishinan ƴan sandan Kano Sama’ila Shu’aibu Dikko ya kama aiki yau Jumu’a.

An haifi Sama’ila Dikko a ranar 27 ga watan Yuli na shekara 1962 a garin Lere na jihar Kaduna.

Bayan ya kammala Firamare da Sakandire daga shekarar 1970 zuwa 1982 ya shiga jami’ar Ahmadu Bello da ke Zariya inda ya yi digirinsa a kan nazarin ayyuka.

Bayan ya kammala ya yi bautar ƙasa a jihar Rivers a 1986 zuwa 1987.

Daga nan kuma sai ya shiga aikin ɗan sanda a ranar 3 ga watan Maris na shekarar 1990.

Sabon Kwamishinan ‘Yan sandan Kano Sama’ila Shu’aibu Dikko

Dikko ya samu horo a kwalejin ƴan sanda da ke Kaduna.

Ya riƙe muƙamai da dama a rundunar ciki har da dogarin tsaron mataimakin Gwamnan jihar Nassarawa.

Kafin naɗin sa a wannan matsayi shi ne mataimakin Kwamishinan ƴan sanda na jihar Adamawa.

Hotunan yadda Kwamishinan ya shiga ofishinsa da ke Shalkwatar ‘Yan sanda ta Bompai

Mun tattaro waɗannan bayanan ne daga shafin mai magana da yawun ƴan sandan Kano DSP Abdullahi Haruna Kiyawa na Facebook.