Aikin jin kai: Gwamnati tarayya zata bai wa jihohi tallafin rage radadin ambaliyar ruwa

Shugaban hukumar hasashen yanayi ta kasa Mr. Clement Nze ya ce, gwamnatin tarayya zata raba tallafi ga wasu jihohin kasar nan da ambaliyar ruwa ta shafa don rage musu radadi.

Clement Nze ya bayyana hakan ne yayin da ya ke zantawa da manema labarai a jiya Juma’a a birnin tarayya Abuja.

Ya ce, tuni gwamnatin tarayya ta kafa kwamiti kan ambaliyar ruwa, da zai rika bibiyar ayyukan bada kayan rage radadin ga wadanda lamarin ya rutsa da su.

Nze ya kuma ce kwamitin zai yi gaggawar daukan matakan kare faruwar ambaliyar ruwa musamman wajen samar da dakuna a wasu jihohin don shirin ko-ta-kwana na samarwa wadanda ambaliyar ruwa ta ritsa da su muhallan zama na wucin gadi.