Ambaliyar ruwa ta shafe amfanin gona a Abuja

Ambaliyar ruwa ta mamaye babbar hanyar Abuja zuwa Lokoja kusa da kauyen Anini.

Wannan dai ya faru ne sanadiyyar mamakon ruwan sama da aka samu.

Ambaliyar ruwan kuma mamaye harabar wata sabuwar makaranta da ke kusa da wani tsauni, yayin da motoci suka makale, lamarin da ya kara haddasa cunkoso a kan babbar hanyar.

Kazalika ambaliyar ta mamaye wasu gonaki da ke yankin, musamman a Gada-Biyu, wanda mazauna yankin galibi manoma ne, da ke noman masara, shinkafa, Ayaba da barkono da tumatir kuma tuni ambaliyar ruwan ta shafe su.