An buɗe harkokin sadarwa a Gusau babban birnin jihar Zamfara

Gwamnatin jihar Zamfara ta tabbatar da cewa ta dawo da harkokin sadarwa a Gusau babban birnin jihar a ranar Juma’a 1 ga watan Oktoba.

Mai magana da yawun gwamnan jihar Zailani Baffa ne ya bayyana hakan a zantawar sa da Freedom Radio ta wayar tarho.

Zailani Baffa ya ƙara da cewa, ya zuwa yanzu akwai matsalar Network da ake fuskanta a babban birnin.

Sai dai ya bada tabbacin cewa nan ba da daɗewa ba za a magance matsalar.

“Duk da cewa sai a hankali komai zai zama dai dai sakamakon yadda aka cire network din tsawon lokaci, a yanzu ba kowa ne zai iya samun yadda yake so ba kamar baya” in ji Zailani Baffa.

Baffa ya tabbar da cewa an dawo da harkokin sadarwar ne biyo bayan kyakkyawan rahoton da gwamnati ta samu na nasarar yaƙar ƴan ta’adda a Gusau.