An bude cibiyar killace masu korona da ke Sani Abacha

Gwamnatin jihar Kano ta ce duk da alkaluma sun nuna cewa Jihar Kano na kan gaba wajen samun nasarar yakar cutar Corona, to amma wajibi ne a ci gaba da daukar matakan kariya daga cutar.

Gwamna Dr Abdullahi Umar Ganduje ne ya bayyana hakan a yau lokacin da yake karbar bakuncin jami’an cibiyar killace masu cutar dake filin wasa na Sani Abacha dake Kofar Mata, wadda Alhaji Aliko Dangote ya samar.

Ya kara da cewa a yanzu haka kididdiga ta nuna cewa Kano ce ta 11 a masu kamuwa da cutar a kasar nan, wanda ke nuna gagarumar nasara in aka samu, la’akari da yadda a baya ita ce ta uku, a don haka ne ya godewa Alhaji Aliko Dangote bisa samar da cibiyar wacce aka kammala ta.

A na sa bangaren Alhaji Abdulkadir Sidi wanda ya wakilci Alhaji Aliko Dangote, ya ce an kirkiri cibiyar ne don taimakon gwamnati wajen yaki da cutar Corona, inda aka sanya na’urori da dama da kudinsu ya kai kimanin naira miliyan 500, sannan tana dauke da gadaje 200, dari a bangaren mata dari a bangaren maza.

Wakiliyarmu Zahra’u Nasir ta rawaito gwamna Abdullahi Umar Ganduje ya ziyarci wajen da ake ajiyar kayan kariyar cutar Corona.