An ceto ‘yan Najeriya da aka yi safarar su zuwa kasar Labanon – Minista

Gwamnatin tarayya ta sake ceto rukunin ‘yan kasar nan da aka yi safarar su zuwa kasar Labanon su ashirin da bakwai a jiya Lahadi a filin jirgin saman Nnamdi Azikiwe.

Ministan harkokin kasashen waje Geoffrey Onyema ne ya bayyana hakan ta bakin mai magana da yawun ministan Ferdinand Nwonye.

Ya ce dawo da ‘yan kasar nan daya ne daga cikin alkawuran da gwamnatin tarayya ta yi na tabbatar da babu wani dan kasar nan da ke kasar ta Labanon da sunan bauta.

Geoffrey Onyema ya kara da cewa, da dama yan kasar nan da suka amince aka tafi da su kasar Labanon kuma suke cikin tsaka mai wuya tare da neman agaji, a don haka gwamnatin tarayya ba za ta amince da ganin yan kasar nan na shan wahala ba.