An kamo ɗaurarru 8 da suka tsere daga gidan yarin Jos

Rundunar yan sandan jihar Filato ta tabbatar da kamo ɗaurarru takwas cikin wadanda suka tsere daga gidan gyaran hali na Jos sakamakon harin da ƴan bindiga suka kai wa gidan.

Mai magana da yawun rundunar ASP Ubah Ogaba ne ya bayyana hakan cikin wata sanarwa da ya bayar a safiyar Litinin ɗin nan.

ASP Ubah Ogaba ya ce, bakwai daga cikin ɗaurarrun yan sanda ne suka samu nasarar kamo su, yayin da guda daga ciki ya miƙa wuya da kan sa.

A jiya lahadin ne wasu ƴan bindaga suka kai farmaki gidan gyaran hali a Jos, lamarin da yayi sanadiyyar tserewar wasu daga cikin ɗaurarru.