An rantsar da Abdullahi Abbas a matsayin shugaban jam’iyyar APC a Kano

Jam’iyyar APC ta kasa ta rantsar da zababben shugaban jam’iyyar na Kano Abdullahi Abbas.

An rantsar da Abdullahi Abbas ne a ranar litinin a Abuja jim kadan bayan mika shugabancin jam’iyyar na kasa a hannun gwamnan jihar Neja Abubakar Sani Bello.

Sakataren yada labaran jam’iyyar na Kano Ahmad S Aruwa ne ya tabbbatar da hakan ga Freedom Radio.

 “A yanzu Abdullahi Abbas shi ne halastaccen shugaban jam’iyyar mu a Kano babu wata sauran hamayya tun da ga shi shugabanci na kasa ya rantsar da shi “

Idan za a iya tunawa dai an yi tirjiya kan hallacin shugabancin jam’iyyar tsakanin tsagin gwamnan Kano Dr Abdullahi Umar Ganduje da kuma tsagin tsohon gwamna Malam Ibrahim Shekarau lamarin da ya kai su da gurfana gaban Kotu.