Yajin aiki : An tashi baran-baran a taron da gwamnati ta yi da PENGASSAN

Gwamnatin tarayya da kungiyar manyan ma’aikatan man fetur da iskar gas ta kasa PENGASSAN ba su cimma matsaya ba, a zaman da suka yi a jiya.

Mai magana da yawun kungiyar ta PENGASSAN ta kasa Jerry Amah ne ya bayyana hakan, biyo bayan rashin cika wasu bukatun kungiyar da Gwamnatin ba tayi ba.

Jaridar Punch ta ruwaito cewa, a ranar Lahadin makon da ya gabata ne kungiyar PENGASSAN ta umarci su janye daga ayyukan su, kasancewar rashin fahimta da suka samu tsakanin su da Gwamnatin tarayya kan tsarin biyan albashi na IPPIS da kuma wanda suke kansa a baya.

Sai dai ma’aikatar ayyuka da samar da ayyukan yi ta kira taro a wani mataki na kawo karshen yajin aikin da suke yi.